របៀបគិតទាំង ៦​ ដែលមានប្រយោជន៍សម្រាប់ជីវិតប្រចាំថ្ងៃ

ការគិតមានឥទ្ធិពលខ្លាំងណាស់ទៅលើជីវិតរស់នៅប្រចាំថ្ងៃរបស់យើង។ ផ្នត់គំនិតមួយដែលល្អត្រឹមត្រូវនឹងនាំយើងឱ្យដើរលើវិថីមួយដ៏ត្រឹមត្រូវ។ ការគិតរបស់មនុស្សម្នាក់ៗមានភាពខុសៗគ្នាទៅតាមចំណេះដឹង និងបទពិសោធន៍ដែលពួកគេបានឆ្លងកាត់រៀងៗខ្លួន។ ខាងក្រោមនេះ គឺជារបៀបគិតទាំង ៦ ដែល Sala គិតថាអាចមានប្រយោជន៍សម្រាប់ជីវិតរស់នៅប្រចាំថ្ងៃរបស់អ្នកទាំងអស់គ្នា។

១. គិតបញ្ហាជាឱកាស មិនមែនជាឧបសគ្គ
រៀនគិតបែបនេះធ្វើឱ្យយើងមិនភ័យខ្លាចនឹងបញ្ហា និងមានភាពក្លាហានដើម្បីប្រឈមមុខនឹងវា ព្រោះថាការដោះស្រាយបញ្ហាបានមួយ អាចបង្កើនសមត្ថភាពនៃគំនិត​ និងវិធីសាស្រ្តដោះស្រាយបញ្ហារបស់យើងបានមួយកម្រិត។ ទាំងនេះ ផ្ដល់ឱកាសឱ្យយើងរិះរកនូវអ្វីដែលថ្មីដើម្បីឆ្លើយតបទៅនឹងបញ្ហាទាំងនោះ។​ ការគិតបែបនេះ ត្រូវបានយកទៅអនុវត្តដោយបុគ្គលល្បីៗ និង​អ្នកប្រាជ្ញមួយចំនួនដូចជា Thomas Edision ជាអ្នកបង្កើតនូវអំពូលភ្លើងដែលគាត់យកភាពងងឹតជាបញ្ហា។ Niko Tesla​ អ្នកបង្កើតចរន្តឆ្លាស់ និងជាអ្នកប្រាជ្ញមួយរូបខាងរិះរកអ្វីដែលថ្មីទាក់ទងនឹងអគ្គិសនី​ និងមេកានិច។ Karl Benz ជាអ្នកបង្កើតរថយន្ត។ Alexander Graham Bell ជាអ្នកបង្កើតទូរសព្ទដំបូង និង​ មហាសេដ្ឋីមួយចំនួនដូចជា Mark Zuckerberg អ្នកបង្កើត Facebook ដែលធ្វើឱ្យមនុស្សជុំវិញពិភពលោកទាក់ទងគ្នាបានងាយស្រួលជាងមុន។ Larry Page និង​ Sergey Brin អ្នកបង្កើត Google បូករួមនឹងអ្នកប្រាជ្ញា និងបុគ្កលល្បីៗ​ មហាសេដ្ឋីល្បីៗ មួយចំនួនទៀតដែលពួកគេសុទ្ធសឹងតែយកបញ្ហាជាឱកាសក្នុងការបង្កើតនូវអ្វីដែលថ្មី និងដំណោះស្រាយថ្មី។

២. ការគិតបែបឆ្លុះបញ្ចាំង
ការគិតបែបនេះសំដៅដល់ការគិតពីកំហុសរបស់ខ្លួននិងព្យាយាមរៀនអំពីវា ដើម្បីស្វែងរកផ្លូវទៅកាន់ភាពជោគជ័យនៃគោលដៅ។ ជាជាងការគិតបែបស្ដីបន្ទោសពីភាពបារាជ័យ បន្ទោសនេះបន្ទោសនោះថាជាអ្វីដែលរាំងស្ទះគោលដៅរបស់យើងដោយមិនព្យាយាមរៀនពីកំហុសថាហេតុអ្វីបានជាវាបែបហ្នឹង យើងមិនអាចរៀនពីកំហុសរបស់ខ្លួនឯង និងដឹកនាំខ្លួនឯងឱ្យដើតនៅលើផ្លូវដែលត្រឹមត្រូវបានទេ និងឈានទៅរកភាពជោគជ័យបានទេ។ មនុស្សដែលមានការគិតបែបឆ្លុះបញ្ចាំងបែបននេះ គេតែងរៀនពីកំហុសនិងស្វែងរកផ្លូវដែលត្រឹមត្រូវដើម្បីដើរតាមរយៈកំហុសទាំងអស់នោះ។

៣. គិតបែបឆ្នៃប្រឌិត
ការគិតបែបឆ្នៃប្រឌិត មានន័យថា គិតឲ្យខុសពីរបៀបគិតធម្មតា ឬគំនិតដែលគេមិនធ្លាប់ដឹង​។ វាជាវិធីគិតដើម្បីស្វែងរកដំណោះស្រាយថ្មីៗ អ្វីដែលថ្មី ការបង្កើតថ្មី ដោយមិនដើរតាមចន្លោះគំនិតដដែលៗ។ តើយើងអាចធ្វើការគិតបែបនេះបានដោយរបៀបណា? ចម្លើយនោះគឺព្យាយាមរៀនពីអ្វីដែលថ្មីឱ្យបានច្រើន និងសង្កេតមើលគ្រប់បរិបទជុំវិញខ្លួន។ ការគិតនេះ អាចបានមកពីបទពិសោធន៍ជុំវិញខ្លួន និង​ចំណេះដឹង​ ដែលបានមកពីការស្រាវជ្រាវ និងការសិក្សា។
ឧទាហរណ៍នៃការគិតបែបនេះ៖ ការច្នៃបង្កើតរថយន្តអគ្គិសនីជំនួសឱ្យការចាក់សាំង ការច្នៃបង្កើតរ៉ូបូតឱ្យធ្វើការឱ្យមនុស្ស ការបង្កើតកសិកម្មដោយដាំបន្លែលើទឹកជាដើម។ល។​ គំនិតនេះ អាចបានមកពីបទពិសោធន៍ជុំវិញខ្លួន និង​ចំណេះដឹង​ ដែលបានមកពីការស្រាវជ្រាវ និងការសិក្សា។

៤. គិតដោយប្រើប្រាស់ការពិចារណា និងចក្ខុវិស័យ
ប្រភេទការគិតនេះផ្អែកលើអារម្មណ៍ ខាងក្នុង និងការមើលឃើញពីចក្ខុវិស័យវែងឆ្ងាយ។ វាប្រើសម្រាប់ការស្វែងរកហេតុផល គោលគំនិត ស្វែងរកអ្វីដែលខុសនិងត្រូវ ដំណោះស្រាយបញ្ហា និងការដឹកនាំមនុស្ស។ ចំពោះការដឹកនាំមនុស្ស គឺអាស្រ័យលើចក្ខុវិស័យ និង​ការប្រើប្រាស់ការពិចារណាដូចគ្នា។ ឱទាហរណ៍៖ នៅពេលដឹកនាំបុគ្គលិកក្នុងក្រុមហ៊ុនមួយតម្រូវឱ្យមានចក្ខុវិស័យវែងឆ្ងាយ គិតវិភាគឱ្យបានសុីជម្រៅ និង​តម្រូវឱ្យមានភាពវៃឆ្លាតខាងអារម្មណ៍ដើម្បីដឹងពីចិត្តរបស់បុគ្គលិក ដើម្បីធ្វើការលើកទឹកចិត្ត និងដឹងពីរបៀបគិតរបស់បុគ្គលិក។​ ការគិតបែបនេះមានសារៈសំខាន់និងមានឥទ្ធិពលខ្លាំងណាស់ទៅលើការសម្រេចចិត្តនិងជីវិតរស់នៅប្រចាំថ្ងៃរបស់យើង ព្រោះថាបើយើងសម្រេចចិត្តទៅលើរឿងអ្វីមួយដោយគ្មានការគិតពិចារណាបានល្អិតល្អន់ គិតពីបញ្ហាប្រឈម គិតពីវិធីទប់ស្កាត់ និងគិតឱ្យបានសុីជម្រៅដោយប្រុងប្រយ័ត្ននោះទេ វាអាចនាំឱ្យយើងធ្វើការសម្រេចចិត្តខុស និងប្រឈមមុខនិងហានិភ័យខ្ពស់។ ការគិត​​ បែបនេះភាគច្រើន​បានមកពីធម្មជាតិនៃការយល់ដឹងផ្ទាល់ខ្លួន និង​ បទពិសោធន៍ជីវិត។

៥. គិតបែបឈ្នះៗ
គឺជាវិធីគិតដែលផ្អែកលើការបង្កើតដំណោះស្រាយឲ្យបានល្អបំផុត។ វាស្រដៀងនឹងការប្រកួតប្រជែងគ្នារវាងគំនិត ហើយជ្រើសយកតែគំនិតដែលឈ្នះ ឬមានប្រសិទ្ធភាពខ្ពស់។ 

ឧទាហរណ៍៖

បញ្ហា៖ ក្រុមសិស្សម្នាក់ត្រូវបង្កើតគម្រោងអាជីវកម្មមួយដើម្បីប្រកួតជាមួយក្រុមផ្សេងៗក្នុងសាលា។

ការគិតបែបឈ្នះៗ៖

• ពួកគេមិនគិតតែអំពីការចូលរួមទេ ប៉ុន្តែគិតពីរបៀបធ្វើឲ្យគម្រោងរបស់ខ្លួន ល្អជាងគេ។
• ពួកគេពិនិត្យគម្រោងរបស់គេជាច្រើនដង ដើម្បីរកចំណុចខ្សោយនិងធ្វើឲ្យវាលេចធ្លោជាងគេ។
• ពួកគេច្នៃប្រឌិតរបៀបធ្វើបទបង្ហាញ (Presentation) ឲ្យមានសោភ័ណភាព ងាយចាំ ដើម្បីឱ្យមានភាពទាក់ទាញ។
• ពួកគេចូលរួមការធ្វើបទបង្ហាញដោយមានការរៀបចំល្អ មានការជឿជាក់ 

ការគិតបែបឈ្នះៗនៅមានន័យថា មិនមែនត្រឹមតែច្នៃប្រឌិតទេ ប៉ុន្តែគិតដើម្បី ឈ្នះ និងឈានមុខអ្នកដទៃ ដោយប្រើប្រាស់គំនិតថ្មីៗបន្សំជាមួយការយល់ដឹងរបស់ខ្លួន។

៦. ការគិតបែបយុទ្ធសាស្រ្ត
ការគិតបែបនេះ សំដៅដល់ការកំណត់គោលដៅ ការរៀបចំផែនការ ការវិភាគ និង សម្លឹងមើលអនាគតវែងឆ្ងាយ ដើម្បីរៀបចំផែនការសម្រាប់ត្រៀមប្រឈមមុខនឹងវា។ រៀនគិតបែបនេះ ជួយឱ្យយើងរៀនកំណត់ដឹងពីគោលដៅប្រចាំថ្ងៃរបស់យើង មិនថាប្រចាំខែ ប្រចាំឆ្នាំ និង​ប្រចាំសប្ដាហ៍​ អាចជាការដាក់គោលដៅដើម្បីសម្រេចអ្វីមួយ ឬដើម្បីធ្វើរឿងអ្វីមួយ ដែលវាផ្ដល់ឱ្យយើងនូវវិន័យសម្រាប់ខ្លួនឯង និងការរៀបចំទុកសម្រាប់ពេលអនាគតវែងឆ្ងាយ។

សរុបមក ការគិតអាចគ្រប់គ្រង និងតម្រង់ផ្លូវជីវិតរបស់យើងបាន។ បើយើងមានផ្នត់គំនិតមួយដ៏ល្អ វីថីជីវិតរបស់យើងនឹងបាញ់ទិសដៅទៅរករឿងដែលល្អ។

- ទាញយក Sala App៖ https://onelink.to/7yz2t8

- តាមដានព័ត៍មានអាហារូបករណ៍ និង ឱកាសជាច្រើន៖ https://t.me/Sala_Community